دل خلقت خدا کو صنما جلا نہ چنداں
دل خلقت خدا کو صنما جلا نہ چنداں
کہ فلک کے پار پہنچے تف آہ درد منداں
کہیں کیا کہ دیکھتے ہیں تجھے غیر ساتھ خنداں
رہے ہونٹ ہو چباتے بہ جگر فشردہ دنداں
وہیں جھڑ گلوں کے تودے بندھیں گلبنوں کے نیچے
کبھو صبح دم چمن میں جو وہ غنچہ لب ہو خنداں
کہو کیا برار صحبت مری اس کی ہو عزیزاں
دل نازک اپنا شیشہ دل سنگ اس کا سنداں
نہ بچے گا صید ان سے کوئی آہوئے حرم تک
جو رہے شکار افگن یہی عنبریں کمنداں
کبھو رنگ سے حنا کے سر دست و پا نگاریں
نہ سوائے خون عاشق کریں یہ نگار بنداں
نہ ہو غیر ساتھ ہر دم متبسم اے پری وش
نہ نمک فشاں ہو دل کے سر ریش مستمنداں
کئے شانہ ریش کو یاں عبث آئے شیخ جی تم
کہ یہ جمع بزم رنداں ہے فریق ریش خنداں
نہیں فال لب پہ اس کے یہ ہے مہر خامشی کی
وہی سمجھے ہے یہ نکتہ کہ جو ہے بڑا سخنداں
کہیں سرو سے مشابہ تیرے قد کو پست فطرت
یہ ہے گوش زد ہمارے سخن نظر بلنداں
سبھی محو خودنمائی بہ مثال آئنہ ہیں
یہ خدائی سے نرالا ہے گروہ خود پسنداں
تری وصف کا کمر کے نہ بندھا کسی سے مضموں
رہے خواب میں عدم تک جو کئی خیال بنداں
محبؔ اس ادا کے صدقے کہ اٹھائے مار ٹھوکر
سر پائے نازنیں سے وہ سر نیاز منداں
This work was published before January 1, 1929, and is in the public domain worldwide because the author died at least 100 years ago.
Public domainPublic domainfalsefalse